ஒவ்வொரு பெற்றோரும் வீட்டில் கட்டாயம் வைத்திருக்க வேண்டிய மருந்துகள்
பொதுவாக வீட்டில் வைத்திருக்க வேண்டிய மருந்துகள் என்றால், அவசர தேவைக்காக சில அடிப்படை மருந்துகளை நாம் அனைவரும் வீட்டில் வைத்திருப்பது வழக்கம். குறிப்பாக வீட்டில் குழந்தைகள் இருந்தால், சிறிய உடல்நல பிரச்சினைகளுக்கே உடனடி தீர்வு கிடைக்க வேண்டும் என்பதற்காக சில மருந்துகளை முன்கூட்டியே ஸ்டாக் செய்து வைப்பது மிகவும் அவசியமானதாகிறது. காய்ச்சல், சளி, மூக்கடைப்பு, இருமல், வயிற்றுப்போக்கு போன்ற பிரச்சினைகள் குழந்தைகளுக்கு அடிக்கடி ஏற்படக்கூடியவை. குறிப்பாக குளிர்காலம் மற்றும் பனிக்காலத்தில் இந்தப் பிரச்சினைகள் அதிகமாகக் காணப்படும்.
அத்தகைய சூழ்நிலையில் உடனடியாக மருத்துவரை அணுக முடியாத நேரங்களில், வீட்டிலேயே தேவையான மருந்துகள் இருந்தால் நிலைமை மோசமாகாமல் கட்டுப்படுத்த முடியும். இதுகுறித்து ஈ.எஸ். குழந்தை பராமரிப்பு மையத்தின் குழந்தைநல மருத்துவர் டாக்டர் பிரதீப் அவர்கள், தனது இன்ஸ்டாகிராம் பக்கத்தில் ஒவ்வொரு பெற்றோரும் வீட்டில் கட்டாயம் வைத்திருக்க வேண்டிய 6 முக்கிய மருந்துகள் மற்றும் அவற்றை பயன்படுத்த வேண்டிய சரியான முறைகள் குறித்து விரிவாக விளக்கியுள்ளார். அவை என்னென்ன என்பதை இப்போது பார்க்கலாம்.
1. பாராசிட்டமல்
குழந்தைகளுக்கு காய்ச்சல் ஏற்பட்டால் அதிகம் பயன்படுத்தப்படும் மருந்து பாராசிட்டமல். ஆனால் காய்ச்சலுக்காக உடனடியாக இந்த மருந்தை கொடுக்காமல், முதலில் ஒரு டிஜிட்டல் தெர்மாமீட்டரை கொண்டு குழந்தையின் உடல் வெப்பநிலையை சரியாக பரிசோதிக்க வேண்டும். உடல் வெப்பநிலை 99.5 டிகிரி ஃபாரன்ஹீட்டிற்கு மேல் இருந்தால் மட்டுமே பாராசிட்டமல் கொடுக்க வேண்டும். அதற்கு குறைவாக இருந்தால் இந்த மருந்தை தவிர்ப்பது நல்லது.
ஒவ்வொரு டோஸ் பாராசிட்டமலுக்கும் இடையே குறைந்தது 6 மணிநேர இடைவெளி இருக்க வேண்டும். மேலும் ஒரு நாளில் 4 முறைக்கு மேல் இந்த மருந்தை கொடுக்கக்கூடாது. 6 மணிநேரத்திற்குள் காய்ச்சல் குறையாவிட்டால், ஈரத்துணியால் உடலை துடைப்பது போன்ற முறைகளைப் பயன்படுத்தலாம். அதிக அளவில் பாராசிட்டமல் கொடுத்தால் கல்லீரலுக்கு சேதம் ஏற்படும் அபாயம் உள்ளது. குழந்தையின் எடைக்கேற்ப மருத்துவர் பரிந்துரைத்த அளவிலேயே இந்த மருந்தை பயன்படுத்த வேண்டும்.
2. சலைன் நாசல் ட்ராப்ஸ்
குழந்தைகளுக்கு மூக்கடைப்பு ஏற்பட்டாலோ அல்லது மூச்சுவிடும் போது கர்..கர்.. என்ற சப்தம் வந்தாலோ, சலைன் நாசல் ட்ராப்ஸ் மிகவும் பயனுள்ளதாக இருக்கும். இதை மூக்கில் சொட்டு மருந்தாகவும் அல்லது ஸ்ப்ரே வடிவிலும் பயன்படுத்தலாம். இந்த மருந்தை 2 முதல் 3 மணிநேரத்திற்கு ஒருமுறை பயன்படுத்தலாம். இதனால் எந்தவிதமான பக்கவிளைவுகளும் ஏற்படாது என்று மருத்துவர் கூறுகிறார்.
3. ஆன்டன்செட்ரான் (Ondansetron)
ஆன்டன்செட்ரான் மருந்து எமிசெட் போன்ற பல்வேறு பிராண்டுகளில் கிடைக்கிறது. குழந்தைகளுக்கு வாந்தி அல்லது குமட்டல் உணர்வு ஏற்பட்டால் இந்த மருந்தை கொடுக்கலாம். ஆனால் இதையும் குழந்தையின் எடையை கருத்தில் கொண்டு, குழந்தைநல மருத்துவர் பரிந்துரைத்த அளவில் மட்டுமே கொடுக்க வேண்டும். அளவுக்கு அதிகமாக கொடுப்பதை தவிர்க்க வேண்டும்.
4. ஓஆர்எஸ் (ORS)
குழந்தைகளுக்கு வயிற்றுப்போக்கு ஏற்படும் போது, உடலில் உள்ள முக்கிய எலக்ட்ரோலைட்டுகளான சோடியம் மற்றும் பொட்டாசியம் போன்றவை அதிக அளவில் வெளியேறிவிடும். இதனால் உடல் நீரிழப்பு ஏற்படும் அபாயம் உள்ளது. இதைத் தவிர்க்க, ஓஆர்எஸ் மிகவும் அவசியமானதாகிறது.
ஒரு பெரிய ஓஆர்எஸ் பாக்கெட்டை 1 லிட்டர் சுத்தமான நீரில் கலந்து, அதை நாள் முழுவதும் குழந்தைக்கு கொடுக்க வேண்டும். இந்த நீரை 24 மணிநேரத்திற்குள் பயன்படுத்திவிட வேண்டும். 24 மணிநேரத்தை தாண்டினால் அந்த நீரை பயன்படுத்தாமல் கைவிட வேண்டும்.
5. முயூப்ரோசின் ஆயின்மெண்ட்
குழந்தைகள் விளையாடும் போது கீழே விழுந்து அடிபட்டாலோ அல்லது சிராய்ப்பு ஏற்பட்டாலோ, முதலில் அந்த இடத்தை சுத்தமான நீரில் நன்கு கழுவ வேண்டும். பின்னர் காயவைத்து, இந்த ஆன்டி-செப்டிக் முயூப்ரோசின் ஆயின்மெண்ட்டை தடவ வேண்டும். இது தொற்று ஏற்படாமல் பாதுகாக்க உதவும்.
6. வைட்டமின் டி ட்ராப்ஸ்
உங்கள் வீட்டில் 1 வயதிற்குள் இருக்கும் குழந்தை இருந்தால், வைட்டமின் டி ட்ராப்ஸை தவறாமல் கொடுக்க வேண்டும். ஒரு நாளைக்கு 400 யூனிட் வைட்டமின் டி அவசியம். சில பிராண்ட்களில் 1 மில்லியில் 400 யூனிட் இருக்கும், சிலவற்றில் 0.5 மில்லியில் 400 யூனிட் இருக்கும். நீங்கள் பயன்படுத்தும் பிராண்டை பொருத்து சரியான அளவில் இந்த மருந்தை கொடுக்க வேண்டும் என்று மருத்துவர் அறிவுறுத்துகிறார்.
குறிப்பு: எந்த மருந்தையும் பயன்படுத்தும் முன் குழந்தையின் உடல் நிலை மற்றும் வயதை கருத்தில் கொண்டு, மருத்துவரின் ஆலோசனை பெறுவது மிகவும் அவசியம்.
View this post on Instagram
